قال ما عاد في ناموس قال!

28 06 2011

لك وعم يقولوا الناس ما عاد فيها ناموس؟؟؟ إي إجباري!! لأنو الناموس معبي البلد! لك إي إي الناموسة الطبيعية يلي بتقرص البني آدم وبتمصلوا دمه وبتترك أثر يدعو للحكوكة متل الجربانين!

لك إي الناموسة! شبنا؟؟؟ والله لا عم موّه ولا عم لمّح لشي تاني! هي الناموسة يلي في منها على صغير (البرغشة يعني) وفي منها على كبير متوحش بترتعب بس تقرّب عليك على قد مو اسم الله رجليها طوال “طول الحورة يا بعدي” وأجنحتها ولا أجنحة الفراشة!

لك شو بدي قول لقول، هي الناموسة نفسها يلي كان يقتلها النمش بالمسلسل الهندي… قصدي مسلسل البيئة الشامية “باب الحارة” لك آاااااخ لك وينك يا نمس! ضروري تطلع مدسوس وعوايني!

كان من زمان النمش يدور عل ناموسة وصرع راسنا طول المسلسل على قولة” يا ناموشة وينك وينك” إي هلأ ما شاء الله حولها وحوليها هل ناموسة، إي بتدوّر على عشرة متل النمش!

بس لا تقلولي أكره شي وقت بتطلعلوا للواحد على شكل غارة جوية وهو عم يحاول ينام، لاء وما بيعجبها تطير إلا فوق إدنو للواحد!

وعلى شرطتكون صايرين فجعانين، لك ما بيشبعوا من قرصة وحدة! إذا ما داقوا الدّم يلي بإصبع الرجل الصغيرة والدّم يلي بالجبين وبالإيد والأظافر وبعد شوي الشّعر ما بينبسطوا! الله وكيلكون كل يوم عم نفيق متل يلي معو جرب نازلين حكوكة وهرش بحالنا!

لك ما تركنا فاب على بف باف على ريد على القرود السعادين وعبث! لك والله آخر شي تركتلها الغرفة لتسرح وتمرح فيها… بس أبداً وحياة يلي خالقك مالي مفارقك!

وما بدنا نقول البلدية مقصرة لأنو الله يعطيهم العافية والله كل يوم عم يجوا يبخوا بس والله ما بعرف هل دواء تقولوا فيتامين مو هيك! لك العمى والله كل ناموسة عم تكبر وتتغذى عليه! ما بدي حطون بذمتي بس مدري الدواء خالصة مدتو أو هل نواميس تمسحوا! يعني بيجوز عم تقولوا لحالكن ناموسة وبدها اتمسح؟؟؟؟ لك إي إي إذا العالم تمسحت فما بالكن بالنواميس!!!!!!

فهلأ يا سادة يا كرام عرفتوا وين راح الناموس من العالم؟؟؟ عرفتوا الناس ليش صايرة مافيها ناموس؟؟؟ لأنو الناموس ليكو مبحوت بالشوارع بحت نازل قرص بهل عالم!

إي الله يطلعك يا نمش بالشلامة وتجي تخلّصنا من هل ناموشة يلي ما عم تخليني أعرف نام!

وبالآخير بحب اهديكن هدية غنية بمناسبة العيد الوطني للناموس!

http://anmish.com/content/namouseh

وهلا والله وحيا الله وأهلييييييييييييييييييييين!!!!!!!!!!!!!!!!!

Advertisements